– यज्ञराज जोशी
धनगढी, ३० फागुन । क्रिकेटको सहर धनगढीमा जारी सगरमाथा सिमेन्ट धनगढी क्रिकेट लिग (डिसिएल–३) मा सन्तोषी टोलविरुद्ध सानदार जित निकाल्दै क्याम्पस रोड अंकतालिकाको शीर्षस्थानमा उक्लिएको छ ।
यस्तै टीम चौराहा दोस्रो स्थानमा झर्दा सन्तोषी टोल तेस्रो स्थानमा यथावत छ । शनिबार नै हसनपुर रोयल्सलाई पराजित गरेर अंक तालिकाको चौंथो स्थानमा झारेको सिवाईसी अत्तरिया चौंथो स्थानमा उक्लिएको छ ।
शनिबार टस जितेर पहिले ब्याटिङ गरेको क्याम्पसरोडले पूरै ओभर खेलेर ९ विकेट गुमाउँदै १ सय ३३ रन जोडेको थियो । यसक्रममा चन्द्र साउदले (४१) ले ३५ बल खेल्दै ५ चौका र २ छक्का प्रहार गरे ।
त्यस्तै कप्तान रोमन बम (३७) ले २० बलमा ६ चौका र २ छक्का प्रहार गरे ।
सन्तोषी टोलकालागि महेश अधिकारी र प्रकाश कार्कीले समान ३ विकेट लिए भने सुनिल धमला र अमित बुढाले १–१ विकेट हात पारे ।
जवाफी ब्याटिंगमा उत्रिएको सन्तोषी टोलले २० ओभरमा ९ विकेट गुमाएर १ सय २१ रनमात्र बनाउन सक्यो ।
सन्तोषी टोलका लागि कप्तान राजु रिजालले ३२ तथा सुनिल धमलाले २६ रनको पारी खेले पनि टीमलाई जितसम्म डोहोर्याउन सकेनन् ।
पुछारका ब्याट्सम्यान महेश अधिकारीले अविजित २२ रनको पारी खेल्दै टीमलाई जिताउन केही आशा जगाएपनि अन्य ब्याट्सम्यानले साथ नदिँदा सन्तोषी टोल लगातार तेस्रो जीत दर्ता गर्नबाट चुक्यो । सन्तोषी टोलका लागि नरेश बुढाऐरले १२ रन जोडे ।
क्याम्पस रोडको जितमा अलराउण्ड प्रदर्शन गरेका चन्द्र साउदले ४ ओभरमा १७ रन खर्चिएर १ विकेट लिए । उनी म्यान अफ द म्याचसमेत चुनिए । यस्तै सन्तोष भट्टको नाममा ३ र ललितसिंह भण्डारीको नाममा २ विकेट रह्यो ।
त्यसअघि शनिबार नै भएको पहिलो खेलमा सिवाईसी अत्तरियाले हसनपुर रोयल्सलाई ६ विकेटले पराजित गर्दै प्रतियोगितामा पहिलो जित हात पार्यो । टस हारेर पहिले ब्याटिंगमा उत्रेको हसनपुर रोयल्सले अलआउट हुँदै ९५ रन जोडेको थियो ।
उसकालागि दिपेन्द्रसिंह ऐरीले सर्वाधिक ३२ रन जोडे । ३२ बलको सामना गरेका उनले ३ चौका र १ छक्का प्रहार गरे । त्यस्तै वसन्तसिंह कार्कीले २६ तथा प्रकाश थापाले १६ रनको योगदान गरे ।
हसनपुरलाई सस्तैमा समेट्ने क्रममा ४ विकेट लिएका सुरेन्द्र चन्द म्यान अफ द म्याच चुनिए । ४ ओभरको स्पेलमा २ मेडन राख्दै उनले मात्र ९ रन खर्चिएका थिए । त्यस्तै मेहबुब आलमले २ विकेट लिए ।
कप्तान मेहबुव आलमले आक्रामक अर्धशतकीय पारी खेलेपछि सिवाईसीको पहिलो जित पक्का भयो । २६ बलको सामना गरेका आलमले ४ चौका र ४ छक्का प्रहार गरे ।
उनकै विस्फोटक पारीको मद्दतमा अत्तरिया १४ ओभर २ बलमा नै लक्ष्य भेट्टाउन सफल भयो । यसक्रममा प्रेम तामाङले १२ रन जोडे । बलिङतर्फ हसनपुर रोयल्सका दिपेन्द्रसिंह ऐरी, प्रकाश थापा, अमित पडाल र भिम सार्कीले समान १/१ विकेट लिए ।
प्रतियोगिता अन्तर्गत आईतबार पहिलो खेलमा सिवाईसी अत्तरिया र टिम चौराहा तथा दोस्रो खेलमा हसनपुर रोयल्स तथा सन्तोषी टोल भिड्दैछन् । गएरातिको वर्षाका कारण पिच भिजेकाले पहिलो खेल प्रभावित भएको छ ।
The post रोमाञ्चक जितसँगै क्याम्पस रोड अंक तालिकाको शीर्ष स्थानमा appeared first on Sajha Post.