चार खेलमा १४ मिनेट मैदानमा ढले नेयमार, एकेडेमीका बच्चा उनको सिको गर्दै (भिडियोसहित)

एजेन्सी, २२ असार । रसिया विश्वकपमा आजबाट क्वाटरफाइनलका म्याचहरु सुरु हुँदैछन् । शुक्रबार ब्राजिल र बेल्जियम भिड्दैछन् । यसैबीच नेयमार आफ्नो फुटबल स्किलका कारण चर्चामा आउनुको सट्टा मैदानमा लड्दा चर्चामा आए । उनलाई अन्य खेलाडीले छुँदा पनि मैदानमा ढलेको भन्दै व्यापक आलोचना भइरहेको छ ।

सामाजिक सञ्जालमा उनको ट्रोल भइरहेको छ भने उनीबाट प्रभावित भएर नक्कल गर्नेहरु पनि थुप्रै भेटिएका छन् ।

आँकडाका अनुसार नेयमार चार म्याचमा ८४० सेकेन्ड अर्थात् १४ मिनेट चोट या चोटको बहाना बनाएर मैदानमा ढलिरहे ।

यतिमात्र होइन, एक फुटबल एकेडेमीका बच्चाहरुले समेत नेयमारको मजाक उडाउन एक भिडियो बनाएर ट्वीट गरे । त्यसमा १० बच्चाहरु बलका लागि भिडिरहेको देखिन्छ । त्यसपछि सबै बच्चा लड्छन् र नेयमारकै स्टाइलमा मैदानमा छट्पटाउँछन् ।