सशस्त्र प्रहरी जवान पार्करलाई अमेरिकाको निम्तो

काठमाडौं । पूर्वी पहाडी जिल्ला खोटाङको राजापानीका विर्खबहादुर सुनार र रीता सुनार छोरा दिनेश सुनार गाउँमा उफ्रिएको, उल्टिएको देख्दा जीवनको यात्रा कसरी गर्ने होला भन्ने चिन्तामा थिए । त्यो चिन्ता लिँदालिँदै जब छोरालाई सशस्त्र प्रहरीका तत्कालिन प्रमूख सनत बस्नेतले उठाएर हलचोक पुराए, उनीहरूको सपनाको पहिलो खुड्कीलो पुरा भयो । अब छोरा कमाउने भयो पाल्न सक्छ भन्ने ठानेका सुनार दम्पत्तीका लागि दिनेश एउटा आशावादी छोराका रूपमा अघि बढेका छन् ।

उनी परिवारको मात्र होइन, गाउँ र देशको आशाका केन्द्रको बाटोमा लागेका छन् । उनको कला हेर्दा सानो छ तर असामान्य छ । पहाडका गोरेटो र बगरमा उफ्रिने, उल्टीने दिनेश त्यहि निरन्तरताको परिशिष्ट बोकेर गिनिज बुक अफ वल्र्ड रेकर्डमा नाम दर्ता गराउने यात्रामा लागेका छन् । त्यसका लागि उनलाई थप तालिम दिन अमेरिकाले बोलाइसकेको छ ।

सशस्त्र प्रहरी संगठनभित्र उनलाई एउटा अब्बल ‘पार्कर’ भनिन्छ । जिम्न्यास्टिकजस्तै विभिन्न विधामा उल्टिने, उफ्रिनेलगायतका कलालाई पार्कर भनिन्छ ।

नेपालमा ‘पार्कर’ खोज्दा निक्कै कम भेटिन्छन् । कम मध्येका पनि दिनेश यति तिक्ष्ण छन् की उनको तुलना सम्भवतः नेपालमा कसैसँग हुँदैन । रबर जस्तो छ उनको ज्यान । जता खुम्चाएपनि खुम्चिने प्रकारको । ‘प्रशिक्षण त लिएको छैन तर अभ्यासले मलाई अघि बढ्न मद्दत गरेको छ’, दिनेश भन्छन् ।

पार्कर थालेको ८ वर्ष पुग्यो, सशस्त्रमा काम थालेको ६ वर्ष । उनी जागिरे हुनुपूर्व नै हलचोकमा ल्याइएका थिए । उनको पार्करको कामै देखेर तत्कालिन सशस्त्र प्रहरी प्रमूख सनतकुमार बस्नेतले खोटाङबाट टपक्क टिपे, दिनेशलाई । ‘मेरो जीवनमा आम्दानीको स्थायी बाटो बनाइदिनुभयो र मेरो कलालाई दुनियाँमा पुराउनका सशस्त्रका अन्य अफिसरले सहयोग गर्नुभयो ।’, उनी थप्छन्,‘अहिले गिनिज बुकमा नाम लेखाउनका लागि पनि संगठनको ठूलो साथ छ ।’

गिनिजबुकको एउटा सपना छँदै छ, अब उनलाई सपनाको देश अमेरिकाले निम्तो दिइसकेको छ । वल्र्ड फ्रि रनिङ पार्कर फेडेरशनले तीन महिनाको तालिमका लागि बोलाएको छ । ‘यो निक्कै खुशीको अवसर बनेको छ मेरो लागि । वल्र्ड च्याम्पियनसीपमा सहभागीताका लागि तयार पार्ने पनि प्रस्ताव गरिएको छ’, दिनेश भन्छन् । उनलाई १० सेप्टेम्बरमा अमेरिकाको निम्तो आयो । निम्तो आउनासाथ उनको ५ वर्षका लागि अमेरिकाको भिषा पनि लागि सकेको छ । तीन महिनासम्म खान बस्न र तालिम निशुल्क दिने फेडेरशनको प्रस्ताव छ ।

हवल्दार सुन्तली, हँसिया, किस्मत २ जस्ता फिल्ममा उनले स्टन्ट म्यानको भुमिका निर्वाह गरिसकेका छन् । उनको यहि कलाका कारणले फिल्मनगरीमा पनि उनको माग बढ्दो छ । २ वर्षसम्म अनवरत अभ्यास गरेपछि पार्कर गर्न सफल भएका दिनेशका भिडियो युट्युवमा पनि चर्चामा छन् ।

‘मस्ट ट्विस्टिङ व्याक फिलिप्स अफ द वाल इन वन मिनट’ टाइटलमा उनले गिनिज बुक अफ वल्र्ड रेकर्ड दर्ता गराउन लागेका हुन् । यो विषयमा अहिलेसम्म गिनिजबुकमा कसैले पनि नाम दर्ता गराएका छैनन् । गराएको खण्डमा उनी पहिलो व्यक्ति हुनेछन् गिनिजबुकका लागि, नेपालका लागि र सशस्त्र प्रहरीका लागि पनि । ‘न्युनतम १५ पटकसम्म गर्नुपर्ने गिनिजबुकमा उल्लेख छ, मैले १८ पटकसम्म गरेको छु ।’, दिनेश आशावादी हुँदै भन्छन्,‘यति गरे मेरो देशको नामलाई विश्वमा चिनाउने एउटा आधार बन्न सक्छु भन्ने विश्वास पनि छ ।’

पार्कर काम शरिरलाई जोखिममा राखेर गरिने काम हो । दुर्घटना भए जीवन नै खतरामा पर्ने भएपनि उनी डराएनन् । भन्छन्,‘सुरक्षित ठाउँ र कन्फिडेन्सले काम गर्छ । आत्मविश्वास बलियो बनाएर यो यात्रामा अघि बढेको छु ।’ उनको सहयात्रामा श्रीमति शर्मिला सुनारले कहिले रोकिनन् । बरू, अघि बढ्ने हौसलामात्र दिइन् । रेसलर बहिनी अस्मिता, काका सुवास, भाई सुनेसले दाईको यो जोखिमपूर्ण कामलाई विश्वमाझ लैजानका लागि हौसाए । ‘परिवारको पूरै सहयोग र साथ छ । म यहि कुराले पनि उत्तोलित भएको छु । बाहिर पनि मलाई साथ दिनेमात्र भेटेको छु ।’

The post सशस्त्र प्रहरी जवान पार्करलाई अमेरिकाको निम्तो appeared first on Sajha Post.