काठमाडौँ, २६ फागुन । केही महिनाअघि भारतमा सम्पन्न दक्षिण एसियाली खेलकुद साग मा स्वर्ण पदक जितेकी जुडो खेलाडी फुपुल्हामू खत्रीले हङ्गेरीमा पनि सोही पदकमा आफ्नो नाम लेखाएकी छन् ।
हङ्गेरीको बुढापेष्टमा आज आयोजित ‘खुला जुनियर जुडो च्याम्पियनसिप’मा उनले ६३ केजी तौल समूहमा स्वर्ण जितेकी हुन् । ब्राजिलमा यसै वर्ष हुने रियो ओलम्पिकको तयारीका क्रममा त्यहाँ प्रशिक्षणका क्रममा रहेकी उनले अन्तिम प्रतिस्पर्धामा हङ्गेरीकी नागी हेनरियत्तालाई पराजित गर्दै स्वर्ण प्राप्त गरेकी हुन् ।
यसअघि पनि उनले सेमिफाइनलमा हङ्गेरीकै बालोघ सारालाई र क्वाटरफाइनलमा किरेकेश ग्रेटालाई पराजित गर्दैै फाइनल सम्मको यात्रा तय गरेकी थिईन् । उनले प्रतिस्पर्धा गरेको स्पर्धामा सात खेलाडीको सहभागिता रहेको थियो ।
रञ्जन तेक्वान्दो छनोटमा
नेपाल पुलिस क्लबका रञ्जन श्रेष्ठले फिलिपिन्सको मनिलामा १६ र १७ अप्रिलमा हुने रियो ओलम्पिक २०१६ का लागि तेक्वान्दो छनोटमा सहभागिता जनाएका छन् ।
कोटेश्वर तेक्वान्दो डोजाङका उत्पादन रञ्जनले आज यहाँ भएको छनोट खेलमा सुनील पौडेललाई १८–५ ले पराजित गर्दै सहभागिता पक्का गरेका हुन् । यसअघि सुनीलले चितवनका शेखर उप्रेतीलाई हराउँदै रञ्जनसँगको भीडन्त तय गरेका थिए ।
योसँगै ओलम्पिक छनोटमा अब ओलम्पिक छात्रबृत्तिमा रहेका निषा रावल र रञ्जनले नेपालको तर्फबाट सहभागिता जनाउने निश्चित भएको छ ।
यसबाहेक १२ औँ दक्षिण एसियाली खेलकुद साग मा रजत पदक विजेता सात खेलाडी मध्येबाट विगतको अन्तराष्ट्रिय प्रतियोगितामा गरेको प्रदर्शन, उत्कृष्टता र सम्भाव्यताको आधारमा अन्य दुई खेलाडी छनोट हुने छन् । यसै क्रममा नेपाली तेक्वान्दो टोलीले एसियाली तेक्वान्दो च्याम्पियनसिप र पारा तेक्वान्दो च्याम्पियनसीपमा सहभागिता जनाउने राष्ट्रिय खेलकुद परिषद् राखेप ले जनाएको छ । रासस
The post हङ्गेरीमा फुपुलाई स्वर्ण appeared first on Sajha Post.