काडमाडौं, ३० कात्तिक । मलेसियामा सम्पन्न एएफसी सोलिडारिटी कप फुटबल प्रतियोगिताको उपाधि नेपालले जितेको छ । यससँगै नेपाली राष्ट्रिय टिमले २३ वर्षपछि अन्तराष्ट्रिय स्तरको आधिकारिक प्रतियोगितामा उपाधि हात पारेको छ ।
यद्यपी उमेर समूह र अन्य प्रतियोगितामा गरी नेपालले खेलेका पछिल्ला तीन प्रतियोगितामा यो तेस्रो उपाधि हो ।
नेपालले पछिल्लो दुई वर्षमा यसबाहेक नै उमेर समूहका दुई र एक अन्तराष्ट्रिय आमन्त्रण फुटबल प्रतियोगिता (बंगबन्धु गोल्डकप)को उपाधि जितिसकेको छ ।
२०७२ भदौमा सातदोबाटोमा जितेको साफ यु–१९ च्याम्पियनसिप र फागुनमा भारतमा जितेको साग फुटबलको उपाधि दुवै उमेर समुहका थिए । गत माघमा बंगलादेशमा जितेको बंगबन्धु गोल्डकपलाई पनि अन्तर्राष्ट्रिय स्तरको मान्यता थिएन ।
त्यसैले पनि सन १९९३ मा बंगलादेशमा सम्पन्न छैटौं दक्षिण एसियाली महासंघीय खेलकुद (साफ हालको साग)मा जितेको उपाधि नेपाली राष्ट्रिय टोलीका लागि अन्तराष्ट्रिय स्तरको पछिल्लो उपाधि थियो । त्यतिबेला यु-२३ नभएर राष्ट्रिय टोलीले नै प्रतियोगितामा सहभागिता जनाउँथ्यो । यसको २३ वर्षपछि आएर नेपालले अर्को प्रतिष्ठित उपाधि उचालेको हो ।
मकाउविरुद्ध १-० को जित दर्ता गरेर नेपाललाई उपाधि जिताउने क्रममा सुजल श्रेष्ठ नायक सावित भए । भरत खवासको सुन्दर क्रसमा सुजलले हेडमार्फत ३०औं मिनेटमा गरेको गोल नेपालको जितमा निर्णायक सावित भयो ।
सोलिडारिटी कपको यो पहिलो संस्करण हो । यससँगै नेपालले प्रतियोगिताको पहिलो च्याम्पियन बन्ने इतिहास पनि कायम गरेको छ ।
The post एएफसी सोलिडारिटी कपको उपाधि नेपाललाई, २३ वर्ष लाग्यो यो दिन आउन appeared first on Sajha Post.
